Leikskólar

Hvar get ég nálgast upplýsingar um stöðu á biðlistum leikskólanna?

Hægt er að nálgast þær upplýsingar hjá leikskólastjórum. 

Á hvaða aldri eru börn tekin inn í leikskólana?

Leikskólarnir í Hveragerði eru fyrir börn frá 12 mánaða aldri til 6 ára aldurs. Ef laus pláss eru á leikskólunum er heimilt að taka yngri börn inn, en þó aldrei yngri en 10 mánaða. Börn hefja að jafnaði leikskólagöngu á tímabilinu maí – október, en þá hætta þau börn sem hefja grunnskólagöngu að hausti.
Börnum er úthlutað leikskólaplássi eftir kennitölu, þeim elstu fyrst.
(2. gr. í Reglum um innritun og gjöld í leikskólum Hveragerðisbæjar.)

Hvernig er forgangsröðun inn á leikskólana?

Rétt á forgangi á leikskólaplássi hjá leikskólum Hveragerðisbæjar hafa eftirfarandi:

• Börn með fötlun og skal þá greining á fötlun viðkomandi vera fyrirliggjandi.
• Börn sem búa við erfiðar félagslegar aðstæður samkvæmt mati velferðarsviðs Hveragerðisbæjar.
• Leikskólakennarar og aðrir starfsmenn leikskólanna geta sótt um forgang fyrir barn sitt á leikskóla bæjarins að uppfylltum þeim skilyrðum sem sett eru um leikskóladvöl í bæjarfélaginu. Leikskólastjóri í leikskóla starfsmanns þarf að styðja umsóknina og færa rök fyrir nauðsyn forgangs.

Börn á forgangslista raðast eftir kennitölu, þau elstu fyrst. Leikskóladvöl barns á forgangslista hefst í fyrsta lagi við tólf mánaða aldur.
(5. gr. um Reglur um innritun og gjöld í leikskólum Hveragerðisbæjar.)

Get ég haldið plássi sem barninu mínu hefur verið boðið ef tímasetning aðlögunar hentar ekki?

Nei, ef foreldrar vilja fresta upphafi leikskólavistar barns sem þeim býðst, fer barnið aftur á biðlistann og næsta barni verður boðið plássið. Þó er hægt að gefa foreldrum nokkra daga í svigrúm.

Lögheimili okkar er annarsstaðar en við erum að fara flytja til Hveragerðis/Ölfus, hefur það áhrif á umsóknina?

Foreldrum er heimilit að sækja um leikskólapláss enda er lögheimili þeirra og barnsins skráð í Hveragerði (eða Ölfus). Ef foreldrar hyggjast flytja í sveitarfélagið geta þeir sótt um leikskóladvöl en tilkynna þarf sérstaklega um lögheilmilisflutninginn til bæjarskrifstofu.
Tilkynning um lögheimilisflutning skal tilkynna með tölvupósti til mottaka@hveragerdi.is.

Hvað gerist ef lögheimili barns er ekki í Hveragerði (eða Ölfusi) þegar aðlögun á leikskólanum á að hefjast?

Þá fer barnið aftur á biðlistann og næsta barni verður boðið plássið.

Er veittur systkinaafsláttur ef fleiri en eitt barn í fjölskyldu eru í dagvistun í Hveragerði?

Já. Systkinaafsláttur gildir á milli dagforeldra, leikskóla og frístundar í Hveragerði.

Afslátturinn er reiknaður af vistgjaldi en gildir ekki af fæðisgjaldi. Hann skiptist þannig:

• Fyrir yngsta barn er greitt fullt gjald.
• Fyrir næstyngsta barn er veittur 30% afsláttur.
• Fyrir þriðja yngsta barn og öll systkini eftir það er veittur 100% afsláttur.

Sækja þarf um systkinaafslátt hjá leikskólastjóra eða forstöðumanni frístundar.

Er hægt að fá námsmannaafslátt á leikskólagjöldum?

Foreldrar í fullu námi geta átt rétt á námsmannaafslætti af leikskólagjöldum. Afslátturinn er 15% ef annað foreldrið er í fullu námi og 30% ef báðir foreldrar eru í fullu námi.

Til að eiga rétt á afslættinum þurfa háskólanemar að vera skráðir í fullt nám, 30 ECTS-einingar á önn, og framhaldsskólanemar að vera í dagskóla og vera skráðir í að lágmarki 17 einingar á önn.

Afslátturinn er veittur eftir á. Að lokinni önn þarf að skila inn staðfestingu frá skóla um að lágmarki 22 loknum ECTS einingum. Afslátturinn er síðan reiknaður afturvirkt og dreginn frá leikskólagjöldum.

Skila þarf nýrri staðfestingu að lokinni hverri önn til að eiga áfram rétt á námsmannaafslætti.

Kemur sveitarfélagið til móts við þá foreldra sem ekki fá leikskólapláss við 12 mánaða aldur barns?

 Já. Foreldrar sem hafa lagt inn umsókn um leikskólavist en fá ekki leikskólapláss fyrir barn sitt við 12 mánaða aldur eiga rétt á foreldragreiðslum samkvæmt reglum Hveragerðisbæjar. Greiðslurnar eru 124.000 kr. á mánuði fyrir hvert barn, að uppfylltum skilyrðum reglnanna.

Nánari upplýsingar um skilyrði og umsóknarferli er að finna í reglum Hveragerðisbæjar um foreldragreiðslur.

Nánari upplýsingar er að finna í reglum bæjarins um foreldragreiðslur.

Hvenær á ég að sækja um leikskólapláss?

Sækja má um leikskólapláss frá fæðingu barns eða þegar kennitala þess hefur verið skráð. Umsókn er því komin inn í kerfið tímanlega þó barn fari ekki á biðlista fyrr en við 12 mánaða aldur.

Hvað er aðlögun og hvernig fer hún fram?

Aðlögun er tímabil þar sem barn, foreldrar og starfsfólk kynnast og byggja upp traust og öryggi áður en hefðbundin leikskólavist hefst. Í leikskólum Hveragerðisbæjar fer fram þátttökuaðlögun þar sem foreldrar taka virkan þátt í starfi leikskólans með barninu fyrstu dagana. Aðlögunin er skipulögð í samráði við leikskólann og tekur mið af þörfum barnsins og fjölskyldunnar. Nánari upplýsingar um framkvæmd aðlögunar veitir viðkomandi leikskóli.

Hvað er mikilvægt að hafa í huga áður en barnið mitt hefur leikskólavist?

Gott er að undirbúa barnið fyrir leikskólabyrjun með því að ræða jákvætt um komandi breytingar. Mikilvægt er að merkja allar eigur barnsins, hafa viðeigandi fatnað og aukaföt til taks og upplýsa leikskólann um ofnæmi, lyf eða aðrar mikilvægar upplýsingar um barnið. Foreldrar fá nánari upplýsingar frá leikskólanum um aðlögun, nauðsynlegan búnað og fyrirkomulag áður en leikskólavist hefst.

Ef áhyggjur vakna vegna hegðunar, þroska eða annarra þátta sem hafa áhrif á barnið mitt hvert leita ég?

Fyrsta skrefið er að ræða við deildarstjóra á deild barnsins eða tengilið farsældar. Þar færð þú leiðbeinandi ráðleggingar um næstu skref og hvað stendur barninu þínu til boða. 

Hver er opnunartími leikskólanna?

Leikskólar Hveragerðisbæjar eru opnir frá 07:45 til 16:30 alla virka daga.