Framkvæmdir í Laugaskarði á lokametrunum

Bæjarráð heimsótti nýverið Sundlaugina Laugaskarði en þar eru framkvæmdir nú á lokametrunum við endurnýjun búningsklefa.  Hvert sem litið er í húsinu eru iðnaðarmenn að störfum og ljóst að þessu flókna verki er að ljúka.  Flísalögn er lokið í búningsklefum en unnið er að flísalögn í tveimur fjölnotaklefum sem teknir verða í notkun um leið og sundlaugin opnar á ný.  Verið er að vinna að tengingu loftræstingar og frágangi í kringum göngubrú sem var endurbyggð að öllu leyti.  Á næstu dögum verður ráðist í lóðafrágang við inngang sem og fyrir framan nýjan sjúkraklefa sem settur hefur verið upp í vesturenda hússins.  Þar undir skjólgóðum sunnanveggnum mun þá um leið myndast nýtt og stærra sólbaðssvæði en eins og allir vita sem sótt hafa sundlaugina Laugaskarði heim á góðviðriðsdegi þá myndast þar gjarnan suðræn stemning með sól og hita.  Opnun sundlaugarinnar hefur dregist vegna aukaverka en nú er gert ráð fyrir að sundlaugin muni opna á ný þann 11. júlí n.k.. 

Það eru fleiri en heimamenn sem bíða með óþreyju eftir að sundlaugin opni.  En þetta innslag birtist í Landanum nýlega og þar er farið vel yfir þær framkvæmdir sem eru í gangi.   

Meðfylgjandi myndir voru teknar á svæðinu og sýna vel stöðu framkvæmda.