Umhverfisnefnd

Í vetur hefur verið unnið að grisjun og ýmsum undirbúningi fyrir sumarið í Lystigarðinum. Gerð hefur verið áætlun af vinum Fossflatar um nýtt útlit á trjábeðum við inngang garðsins og verður unnið að fyrsta áfanga í sumar.

Allt er að verða til reiðu fyrir plokkdaginn 24. apríl. Gert er ráð fyrir að hittast klukkan 10:00 við Lystigarðinn og halda þaðan um bæinn að huga að rusli. Að því loknu kemur fólk með það sem safnaðist aftur að lystigarðinum en starfsmenn bæjarins munu koma því á gámasvæðið til förgunar.

Sumarstarfsmenn hafa verið ráðnir til garðyrkjudeildar. Að venju verður umhirða gróðurs og grænna svæða í forgrunni starfs sumarsins. Sérstök áhersla verður á að laga grasflatir sem hafa ekki verið til fyrirmyndar. Talsvert hefur verið útvegað af trjám sem þarf að planta út í sumar. Vinnuskólinn verður með hefðbundnu sniði og verður vonandi góð þátttaka í honum.

Að vanda verður mikið um að vera hjá umhverfisdeild. Nokkrir sumarstarfsmenn verða ráðnir til afleysinga í áhaldahúsi og gámasvæði. Ætlunin er að malbika svipað mikið og í fyrra en þegar er byrjað að endurgera gangstéttar í bænum. Vegmerkingar verða endurnýjaðar að venju og fyrsta götusópun vorsins stendur fyrir dyrum.

Unnið var að endurskoðun umhverfisstefnu Hveragerðisbæjar í samræmi við samþykkt 34. fundar nefndarinnar.