Umhverfisnefnd

Hveragerðisbær var valin sem tilraunasveitafélag í Zero waste verkefninu. Þar er lögð áhersla á að minnka úrgang, auka endurnýtingu og endurvinnslu. Hveragerðisbær stendur fyrir umtalsverðri starfsemi líkt og önnur sveitarfélög og óhjákvæmilega fellur ýmis úrgangur til við það. Flokkun úrgangs er góð í mörgum stofnunum bæjarins svo sem í grunnskólanum en það er ekki algilt svo samræma þarf úrgangsmál í stofnunum bæjarins.

Vatn er ein af okkar mikilvægustu auðlindum, án þess getur líf ekki þrifist. Hér á Íslandi erum við afar heppin með magn, gæði og í flestum tilfellum aðgengi að fyrsta flokks vatni. Starfssvæði
Heilbrigðiseftirlits Suðurlands b.s. er engin undantekning þar á. Þetta er hins vegar afar viðkvæm auðlind sem þarf að vernda. HES hefur sett fram drög að samþykkt um verndarsvæði vatnsbóla á sínu starfssvæði og beðið hlutaðeigandi sveitarstjórnir um umsagnir. Bæjarstjórn Hveragerðisbæjar fól á fundi sínum þann 11. febrúar 2021 Umhverfisnefnd að gefa umsögn sína um málið.

Þann 24. apríl næstkomandi verður stóri plokkdagurinn haldinn. Hveragerðisbær hefur áður tekið þátt með góðum árangri. Tímasetning dagsins er afar hentug þar sem oft kemur ýmislegt rusl í ljós á vorin.

Hamarinn og umhverfi hans njóta sífellt meiri vinsælda sem útivistasvæði meðal Hvergerðinga. Nýlega var gönguleið í gegnum skógræktina sunnan Hamarsins bætt mjög með nýju yfirborði, endurnýjun trappa við Dynskóga og lýsingu auk annars. Ýmislegt mætti þó bæta svo sem aðgengi að gangstígakerfi bæjarins við Kambahraun, aðgengi að göngustígakerfi inn í skógræktinni, pollamyndun og fleira.

Bruni jarðefnaeldsneytis er ein helsta uppspretta mengunar og gróðurhúsaloftegunda á jörðinni. Smávélar ýmisskonar eru sérstaklega mengandi en bruninn í þeim er gjarnan ófullkominn þar sem nýjustu tækni verður ekki við komið. Rafhlöðutækni hefur fleygt fram á síðustu árum og nú er svo komið að ýmis garðyrkjutæki eru fáanleg rafknúin. Þessi tæki eru orðin af þeim gæðum og endast það vel að mögulegt er að nota þau til krefjandi garðyrkjustarfa. Þar sem rafmagnsvélunum fylgir hvorki loft né hljóðmengun verður starfumhverfi þeirra sem með þær vinna mun heilsusamlegra og einnig verður hægt að nýta þær innanhúss svo sem í gróðurhúsum. Garðyrkjudeild Hveragerðisbæjar stefnir á að skipta þeim vélum sem brenna jarðefnaeldsneyti út fyrir rafknúnar vélar eftir því sem aðstæður gefa tilefni til.

Mikið hefur verið gert í lystigarðinum undanfarið og megum við þakka því Vinum lystigarðsins og Garðyrkjudeild Hveragerðis. Hvergi er lát á og þegar vorar munu þessir aðilar halda áfram því góða starfi sem hafið er, gaman var að sjá hvað Garðyrkjudeildin gerði garðinn jólalegan og margir gerðu sér ferð i garðinn kringum hátíðarnar. Hönnun og teikning á nýju sviði er á lokametrunum og verður það mikið fagnaðarefni að sjá það rísa. Hópur eldri borgara í bænum eru að fara að vinna að samfélagsverkefni að smíða risastórann stól sem er hugsaður þannig að fólk geti sest í hann og tekið mynd af sér í honum, stóll þessi er hugsaður til að prýða lystigarðinn og verður hann settur upp í sumar.