Bæjarstjórn

Liður 4: Beiðni um styrk frá Hestamannafélaginu Ljúfi frá 20. október 2024 - 2410120.
Eftirtalin skjöl eru lögð fram:
Erindi frá Hestamannafélaginu Ljúfi, dags. 20. október 2024.
Minnisblað Helgu Kristjánsdóttur, skrifstofustjóra, með tillögu að afgreiðslu beiðnar, dags. 15. desember 2025.
Bæjarráð lagði til við bæjarstjórn að samþykkja að veita styrk til Hestamannafélagsins Ljúfs vegna viðhalds og uppbyggingar á reiðvegum að fjárhæð kr. 1.000.000.-

Bæjarstjórn samþykkir samhljóða tillögu bæjarráðs um að veita styrk til Hestamannafélagsins Ljúfs vegna viðhalds og uppbyggingar á reiðvegum að fjárhæð kr. 1.000.000.-

Liður 6: Tilnefning aðal- og varafulltrúa Hveragerðisbæjar í farsældarráð á Suðurlandi - 2510056.
Eftirtalin skjöl eru lögð fram:
Samstarfsyfirlýsing vegna farsældarráðs á Suðurlandi.
Drög að skipuriti farsældarráðs á Suðurlandi.
Drög að starfsreglum fyrir farsældarráð á Suðurlandi.
Drög að erindisbréfi fyrir farsældarráð á Suðurlandi.

Bæjarráð lagði til við bæjarstjórn að Erna Harðar Sólveigardóttir, deildarstjóri velferðarþjónustu, yrði kosin aðalfulltrúi og að Nína Kjartansdóttir, ráðgjafaþroskaþjálfi velferðarþjónustu, yrði kosin varafulltrúi Hveragerðisbæjar í ráðið.

Bæjarstjórn samþykkir samhljóða tillögu bæjarráðs.

Erna Harðar Sólveigardóttir, deildarstjóri velferðarþjónustu, er kosin aðalfulltrúi Hveragerðisbæjar í farsældarráð á Suðurlandi.
Nína Kjartansdóttir, ráðgjafaþroskaþjálfi velferðarþjónustu, er kosin varafulltrúi Hveragerðisbæjar í farsældarráð á Suðurlandi.

Fundargerðin er að öðru leyti staðfest samhljóða.

Fundargerðin er staðfest samhljóða.

Liður 5: Þjónustusamningur við Handverk og hugvit undir Hamri 2025-2026 - 2511127.
Þjónustusamningur við Handverk og hugvit undir Hamri 2025-2026 er lagður fram, ásamt fylgiskjali samningsins.

Menningar-, atvinnu- og markaðsnefnd lagði til við bæjarstjórn að samþykkja þjónustusamninginn.

Bæjarstjórn samþykkir samhljóða þjónustusamning við Handverk og hugvit undir Hamri með gildistíma frá undirritun og til 31. október 2026 að tillögu menningar-, atvinnu- og markaðsnefndar. Samningurinn felur í sér afnot félagsins af hluta húsnæðis Hveragerðisbæjar að Breiðumörk 21 til þess að listafólk í Hveragerði hafi aðstöðu til listsköpunar. Bæjarstjórn felur bæjarstjóra að undirrita samninginn fyrir hönd Hveragerðisbæjar.

Liður 6: Beiðni Fiðlufjörs slf. um styrk - 2510114.
Eftirtalin skjöl eru lögð fram:
Beiðni um styrk frá Fiðlufjöri slf., ódagsett.
Fjárhagsáætlun Fiðlufjörs slf. fyrir árið 2026.
Sjálfbærnistefna Fiðlufjörs slf.

Menningar-, atvinnu- og markaðsnefnd lagði til við bæjarstjórn að koma til móts við verkefnið með fjárstuðningi.

Bæjarstjórn samþykkir samhljóða að Fiðlufjör slf. fái endurgjaldslaus afnot af skólahúsnæði fyrir fiðlunámskeið í júní n.k. en styrkbeiðandi skal skipuleggja fyrirkomulag afnota með skólastjóra Gunnskólans í Hveragerði. Bæjarstjórn samþykkir jafnframt samhljóða veitingu fjárstyrks til Fiðlufjörs slf. til þess að halda námskeiðið að fjárhæð kr. 200.000.- eftir að námskeiði er lokið og félagið hefur skilað nauðsynlegum upplýsingum um námskeiðið.

Fundargerðin er að öðru leyti staðfest samhljóða.

Liður 4: Erindisbréf öldungaráðs Hveragerðisbæjar - 2512044.
Nýtt erindisbréf öldungaráðs er lagt fram.

Öldungaráð lagði til við bæjarstjórn að samþykkja erindisbréfið.

Bæjarstjórn samþykkir erindisbréfið samhljóða að tillögu öldungaráðs.

Liður 5: Dagskrá öldungaráðs veturinn 2025-2026 - 2508322.
Öldungaráð lagði til við bæjarstjórn að samþykkja að fundir öldungaráðs til vors 2026 verði haldnir á eftirtöldum dögum: 21. janúar 2026, 18. mars 2026 og 13. maí 2026.

Bæjarstjórn samþykkir samhljóða tillögu öldungaráðs að dagskrá ráðsins til vors 2026.

Fundargerðin er að öðru leyti staðfest samhljóða.

Bæjarfulltrúar Okkar Hveragerðis og Framsóknar leggja sameiginlega fram eftirfarandi bókun:

Nýr tónn sleginn í sögu Hveragerðisbæjar. Nýtt aðalskipulag Hveragerðisbæjar, sem í kjölfar þessa fundar fer til umsagnar íbúa og haghafa, leikur og geymir frumlag þessa kjörtímabils, sem nú sér framundan sínar lögmæltu sólstöður. Kjörtímabil sögulegra valdaumskipta, umbóta, uppbyggingar og samhentra vinnubragða - aukinnar þverpóltitískrar samvinnu og nýrra tíma. Með nýju aðalskipulagi er Hveragerðisbæ sett annað og meira hlutverk í einstakri byggðarþróun austan fjalls, að vera leiðandi sveitarfélag þegar kemur að gæðum og metnaði í allri þjónustu og fræðslu, velferð, skipulagi og umhverfi íbúa.

Meirihluti bæjarstjórnar lýsir ánægju með að á fundi þessum liggi fyrir tillaga að nýju aðalskipulagi Hveragerðisbæjar til samþykktar. Tillagan er í samræmi við þá metnaðarfullu stefnu sem lögð er áhersla á blómstrandi atvinnulíf og að heilsa og vellíðan íbúa séu í forgrunni. Aðalskipulag er stefnumótandi skipulagsáætlun fyrir sveitarfélag þar sem fram kemur framtíðarsýn og stefna sveitarstjórnar um landnotkun, byggðaþróun og byggðamynstur, samgöngu- og þjónustukerfi auk áherslna í umhverfismálum.

Á kjörtímabilinu hefur verið unnin mikil og fagleg vinna við endurskoðun aðalskipulagsins þar sem samráð og samtal við íbúa og atvinnurekendur hefur verið haft að leiðarljósi. Aðalskipulagsnefnd sem skipuð var fagfólki og kjörnum fulltrúum hefur haldið utan um vinnuna ásamt skipulagsfulltrúa bæjarins og hefur það samstarf skilað góðri og vandaðri stefnu hvernig Hveragerði mun byggjast upp í náinni framtíð.

Eitt af lykilatriðum stefnu nýs aðalskipulags er hlutverk gróðurhúsanna, sem um áratuga skeið hafa mótað bæjarmynd Hveragerðis og eru órjúfanlegur hluti af sérstöðu og sjálfsmynd bæjarins. Í greinargerð aðalskipulagsins er bent á að líkur séu á frekari fækkun gróðurhúsa á næstu árum, þar sem verulegur hluti þróunarreita er staðsettur á lóðum þar sem slík mannvirki standa nú. Í ljósi þess er stefna, metnaður og áskorun bæjaryfirvalda þríþætt: að tryggja að ylrækt hafi áfram eðlilegan og raunhæfan sess í bænum, að varðveita tiltekin gróðurhús sem hafa sérstakt sögulegt gildi, og að ný uppbygging taki, þar sem við á, mið af þessari byggingargerð og þeirri ásýnd sem hún hefur skapað.

Þessu er mætt í nýju aðalskipulagi með því að gert er ráð fyrir að núverandi garðyrkjustöðvar geti starfað áfram og gert ráð fyrir nýjum lóðum undir garðyrkjustöðvar á athafnasvæðum. Þá er í aðalskipulaginu lögð áhersla á að við deiliskipulagsgerð þróunarreita skuli leitað leiða til að tryggja varðveislu hluta byggingararfs gróðurhúsanna. Þar er bent á möguleika á að ef ylrækt leggst af í tilteknum gróðurhúsum megi breyta þeim í verslanir, kaffihús eða annað þjónustuhúsnæði, eða nýta þau sem sameiginleg útivistarsvæði innan nýrra fjölbýlishúsabyggða. Þannig má gefa eldri mannvirkjum nýtt hlutverk og skapa áhugaverða blöndu nýrrar byggðar og sögulegra mannvirkja. Til grundvallar mati á varðveislugildi gróðurhúsa liggur greinargerð sem unnin var árið 2020 en það er mikilvægt verkfæri í skipulagsvinnu bæjarins. Með því geta bæjaryfirvöld byggt ákvarðanir sínar á faglegu mati um varðveislugildi einstakra gróðurhúsa. Að lokum er í nýju aðalskipulagi bent á að æskilegt sé að hönnun nýrra húsa innan tiltekinna reita taki mið af eða vísi til byggingararfs gróðurhúsanna. Með því má varðveita sjónræna og menningarlega samfellu í bæjarmyndinni og undirstrika sérstöðu Hveragerðis sem bæjar sem hefur byggst upp í nánum tengslum við jarðhita og ylrækt.

Það er stefna og metnaður meirihluta Okkar Hveragerðis og Framsóknar að gróðurhús verði áfram mikilvægur hluti af bæjarmynd Hveragerðis og verði ekki einungis minjar um liðna atvinnuhætti heldur lifandi hluti af sjálfsmynd bæjarins. Með markvissri stefnumótun og vönduðu skipulagi gefst tækifæri til að varðveita og þróa þessa sérstöðu áfram fyrir komandi kynslóðir.

Meirihluti bæjarstjórnar mun fela bæjarstjóra að skipuleggja á vormánuðum íbúafund um gróðurhús bæjarins, sögu þeirra og stöðu til að tryggja að samráð verði haft við íbúa um stefnu í þessum málum.

Nýju aðalskipulagi Hveragerðisbæjar er ekki bara ætlað að halda vel og faglega utan um bæ á mikilli siglingu, heldur að tryggja að byggðaforysta, lífsgæði og blómlegur vöxtur séu einkenni Hveragerðisbæjar um ókomna tíð.

Dagný Sif Sigurbjörnsdóttir
Halldór Benjamín Hreinsson
Jóhanna Ýr Jóhannsdóttir
Njörður Sigurðsson
Sandra Sigurðardóttir

Fundarhlé var gert kl. 17:18.

Fundi var fram haldið kl. 17:32.

Bæjarfulltrúar D-lista leggja fram eftirfarandi bókun:

Fulltrúar D-listans vilja árétta að aðalskipulagsferlið hefur tekið óeðlilega langan tíma og kostnaður við vinnuna farið langt umfram það sem eðlilega getur talist við gerð aðalskipulags, þótt endurgreiðslur hafi fengist frá Skipulagsstofnun. Þá teljum við einnig alvarlegt að ítrekaðar athugasemdir bæjarfulltrúa hafi ekki fengið eðlilega umfjöllun eða skráningu í fundargerðum og að lítið hafi verið gert til að sýna fram á með hvaða hætti sjónarmið fulltrúa og íbúa hafi mótað endanlega tillögu. Sérstaklega vekur athygli að Skipulags- og umhverfisnefnd, sem mun í reynd bera mesta ábyrgð á framkvæmd og eftirfylgni skipulagsins, hafi ekki fengið vinnuna inn á borð til sín með reglubundnum hætti á meðan mótun hennar stóð yfir fyrr en eftir að vinnu við aðalskipulagið lauk og þá eingöngu til kynningar.

Nýtt aðalskipulag markar stefnubreytingu frá því sem áður hefur einkennt skipulag og uppbyggingu í Hveragerði. Í greinargerðinni er sett fram framtíðarsýn um sjálfbært samfélag þar sem náttúran er í fyrirrúmi og um blómlegt atvinnulíf sem byggir á sérkennum bæjarins. Samt sem áður felur tillagan í sér verulega aukinn þéttleika og víðtæka breytingu á landnotkun þar sem stór svæði sem áður voru hugsuð sem atvinnu- eða miðsvæði eru breytt í íbúðabyggð, jafnframt því að athafnasvæði í kjarna byggðar minnka eða hverfa og atvinnustarfsemi færist í auknum mæli út fyrir bæinn, sunnan við nýjan þjóðveg. Þetta skapar hættu á því að Hveragerði verði í vaxandi mæli svefnbær þar sem íbúðir eru í forgangi en blöndun byggðar og atvinnu dregst saman.

Við teljum sérstaklega að skipulagstillagan á Axlarsvæðinu gangi gegn þeirri stefnu sem fram kemur í greinargerðinni sjálfri um að sérkenni bæjarins og ásýnd hans skipti máli. Þar er bærinn sagður mjög sýnilegur frá Kömbum og þjóðvegi og að mikilvægt sé að huga að bæjarmynd og yfirbragði. Samt er á þessum reit gert ráð fyrir miklum þéttleika og byggð sem mun breyta ásýnd bæjarins og veikja þau einkenni sem Hveragerði hefur byggt upp í áratugi, ekki síst garðyrkjuna og gróðurhúsin. Í stað þess að horft verði inn í Hveragerði og sjá þar þann gróður og þá atvinnustarfsemi sem mótað hefur ímynd bæjarins, verður það sem blasir við frá aðkomunni að bænum fjölbýli í auknum mæli. Þetta teljum við ekki í samræmi við stefnu um blómlegt atvinnulíf byggt á sérkennum bæjarins né við vilja margra bæjarbúa um að halda í lágreista, hlýlega byggð og þorpsyfirbragð sem einkenni Hveragerðis.

D-listinn telur einnig að tillagan gangi of nærri útivistarsvæðum og náttúruverðmætum sem eru hluti af sjálfsmynd bæjarins. Sérstaklega hafa fulltrúar D-listans bent á að með því að setja íbúðabyggð á svæðið meðfram Dynskógum, þar sem Ullarþvottastöðin stóð á sínum tíma, sé verið að þrengja að útivistarsvæðinu undir Hamrinum með óþarfa hætti. Í stað þess að slíkar breytingar gangi inn á jaðarsvæði sem íbúar nýta til útivistar og náttúruupplifunar teljum við eðlilegra og réttara að styrkja þessi svæði og stækka í samræmi við stefnu um að náttúran sé í fyrirrúmi.

Að lokum vilja fulltrúar D-listans árétta það sem við höfum áður sagt að sú umferðar- og bílastæða nálgun sem liggur að baki skipulaginu, og hefur verið kynnt samhliða í umferðar- og bílastæðastefnu, kallar á frekari endurskoðun. Í skipulaginu er sett upp ramma- og viðmiðakerfi sem miðar að því að draga úr bílastæðafjölda og hvetja til virkra ferðamáta. Slíkt getur verið jákvætt í sjálfu sér, en verður að byggja á raunverulegri stöðu og þörfum bæjarbúa. Hveragerði er ekki stórborg og íbúar þurfa í mörgum tilvikum að nota bíl til að komast milli staða, bæði innanbæjar og til vinnu og þjónustu utan bæjarins. Ef bílastæðastefna og hjólastígagerð er sett fram án raunhæfra valkosta og án þess að tekið sé tillit til sjónarmiða bæjarbúa mun það auka ágreining í stað þess að bæta lífsgæði.

Fulltrúar D-listans telja því að aðalskipulagstillagan eins og hún liggur fyrir hafi ekki verið unnin í sátt við bæjarfulltrúa, eðlilega aðkomu nefnda, og íbúa bæjarins.

Friðrik Sigurbjörnsson
Sigurður Einar Guðjónsson

Forseti ber upp tillögu um að bæjarstjórn samþykki að auglýsa fyrirliggjandi tillögu að Aðalskipulagi Hveragerðisbæjar 2025-2037 sbr. framlögð gögn, með vísan til 31. gr. skipulagslaga nr. 123/2010.

Tillagan er samþykkt með 5 atkvæðum bæjarfulltrúa O-lista og B-lista.
Bæjarfulltrúar D-lista sitja hjá við atkvæðagreiðslu.

Forseti ber upp tillögu um að bæjarstjórn samþykki fyrirliggjandi tillögu að breytingu deiliskipulags miðbæjarsvæðis vegna íþróttahúss og að þeim aðilum sem skiluðu umsögn og athugasemdum verði svarað með eftirfarandi hætti.

Umsögn bæjarstjórnar vegna erindis Mílu hf.
Bæjarstjórn verður við beiðni Mílu hf. um að við uppbyggingu verði haft samráð við fyrirtækið vegna lagna.

Umsögn bæjarstjórnar vegna athugasemdar Walters Fannars Kristjánssonar f.h. húsfélagsins að Breiðumörk 22.
Bæjarstjórn telur ekki tilefni til þess að gera breytingar á fyrirliggjandi tillögu að breyttu deiliskipulagi þrátt fyrir að í athugasemdinni sé bent á að fyrirhugaðar framkvæmdir fari inn á leigulóðina að Beiðumörk 22 og séu þannig skerðing á réttindum lóðarleiguhafa. Með samþykki deiliskipulagstillögunnar er bæjarstjórn ekki að breyta afmörkun eða réttindum lóðarleiguhafa en hafnar eru viðræður við lóðarleiguhafa vegna breyttrar afmörkunar á lóðinni.

Bæjarstjórn samþykkir samhljóða breytingu deiliskipulags miðbæjarsvæðis vegna íþróttahúss og umsagnir.

Bæjarstjórn felur bæjarstjóra að sjá um að Mílu hf. og Walter Fannari Kristjánssyni f.h. húsfélagsins að Breiðumörk 22, verði sendar framangreindar umsagnir bæjarstjórnar. Þá er bæjarstjóra falið að halda áfram viðræðum við eigendur Breiðumarkar 22 um ásættanlegar lausnir vegna skerðingar á lóðarréttindum.

Bæjarstjórn samþykkir samhljóða að gjaldfrjálsar klukkustundir í öllum árgöngum í leikskólum Hveragerðisbæjar verði með eftirfarandi hætti:
Fimm klukkustundir gjaldfrjálsar frá 1. janúar 2026
Sex klukkustundir gjaldfrjálsar frá 1. febrúar 2026

Bæjarstjórn samþykkir jafnframt samhljóða að bæjarstjóra verði falið að uppfæra gjaldskrá fyrir leikskólagjöld til samræmis við framangreint.

Forseti bar upp tillögu um að bæjarstjórn samþykkti viðauka við fjárhagsáætlun ársins 2026 að fjárhæð kr. 12.988.800.- vegna breytinga á gjaldskrá leikskólagjalda (2601008), fimm klukkustundir verða gjaldfrjálsar frá 1. janúar 2026 og sex klukkustundir frá 1. febrúar 2026.

Bæjarstjórn samþykkir samhljóða viðauka að fjárhæð kr. 12.988.800.- við fjárhagsáætlun ársins 2026 vegna breytinga á gjaldskrá leikskólagjalda.

Forseti ber upp tillögu um að bæjarstjórn samþykki húsnæðisáætlun Hveragerðisbæjar fyrir árið 2026.

Bæjarstjórn samþykkir samhljóða húsnæðisáætlun Hveragerðisbæjar fyrir árið 2026.

Forseti ber upp tillögu um að bæjarstjórn samþykki fyrirliggjandi samþykkt fyrir Listasafn Árnesinga bs.

Bæjarstjórn samþykkir tillöguna samhljóða.

Forseti ber upp tillögu um að bæjarstjórn samþykki fyrirliggjandi samþykkt fyrir Héraðsskjalasafn Árnesinga bs.

Bæjarstjórn samþykkir tillöguna samhljóða með 6 atkvæðum.

Forseti ber upp tillögu um að bæjarstjórn samþykki fyrirliggjandi samþykkt fyrir Byggðasafn Árnesinga bs.

Bæjarstjórn samþykkir tillöguna samhljóða.

Forseti ber upp tillögu um að bæjarstjórn samþykki reglur um ritun fundargerða og birtingu gagna með fundargerðum.

Bæjarstjórn samþykkir tillöguna samhljóða. Bæjarstjórn felur bæjarstjóra að kynna reglurnar fyrir starfsfólki Hveragerðisbæjar og láta birta reglurnar á heimasíðu bæjarins.

Forseti ber upp tillögu um að bæjarstjórn samþykki að veita Sigríði Hauksdóttur lausn frá störfum varamanns í bæjarstjórn út kjörtímabilið með vísan til 2. mgr. 30. gr. sveitarstjórnarlaga nr. 138/2011.

Bæjarstjórn samþykkir tillöguna samhljóða.