Í Hveragerði er margt markvert  að sjá og auðveldlega má eyða drjúgum tíma  í að skoða það sem bærinn hefur uppá að bjóða.  Byrja mætti daginn á hverasvæðinu þar sem fræðast má um mismunandi tegundir hvera en þeir eru einkar fjölbreyttir á svæðinu.  Hveragerðiskirkja gnæfir yfir gestum en rétt handan hverasvæðisins eru skáldagöturnar Frumskógar og Bláskógar þar sem mörg af stórskáldum þjóðarinnar bjuggu á árdögum byggðar í Hveragerði.  Rétt hjá kirkjunni er Sandhólshverinn og ekki er langt í skógræktina undir Hamrinum en þar hafa verið lagðar fallegar gönguleiðir um skógi vaxnar hlíðar.  Í lystigarðinum í miðbænum er notalegt að borða nestið sitt um leið og tærnar eru bleyttar í ylvolgri ánni og dáðst að Reykjafossi.  Sé gengið yfir göngubrúna í lystigarðinum og upp brekkuna handan árinnar er komið að sundlauginni Laugaskarði þar sem einkar ánægjulegt er að ljúka deginum í sjóðheitum pottunum eða heilsusamlegu gufubaðinu áður en einhver hinna  fjölmörgu veitingastaða bæjarins eru heimsóttir.

Undir flipunum hér til hliðar má finna upplýsingar um áhugaverða staði í Hveragerði ásamt greinargóðum upplýsingum um hverasvæðið í miðbænum og götukorti af bæjarfélaginu.