Eins og Hvergerðingar hafa orðið varir við hefur sú breyting verið gerð á fyrirkomulagi sorphirðu í bænum að innleitt hefur verið svo kallað „Þriggja flokka kerfi”. Eins og nafnið ber með sér er sorpið nú flokkað í þrjár tunnur, brúna, græna og gráa að lit.

Brúna tunnan er eingöngu ætluð undir lífrænan heimilisúrgang. Úrgangurinn er settur er í lífræna maíspoka, sem fást í matvöruverslunum. (ath. æskilegt er að þrífa tunnuna reglulega).

Í grænu tunnuna er settur allur endurvinnanlegur heimilisúrgangur eins og þurr pappír, pappi, plast, minni málmhlutir og fernur.

Í gráu tunnuna er settur óendurvinnanlegur heimilisúrgangur eða annar úrgangur en sá sem fer í brúnu og grænu tunnurnar.

Smellið hér til að opna flokkunarbæklinginn frá Íslenska gámafélaginu.

Markmiðið með breyttu fyrirkomulagi sorphirðu í Hveragerði er að lágmarka það magn sorps sem fer til urðunar. Eins og allir vita þá hefur urðunarstaðnum að Kirkjuferjuhjáleigu verið lokað og því er öllu sorpi, öðru en lífrænu og endurvinnanlegu, ekið til urðunar í Álfsnesi en þar er urðunarkostnaður mun hærri en var að Kirkjuferjuhjáleigu.

Á gámasvæðinu er tekið á móti öllum úrgangi, sem ekki flokkast sem daglegur heimilisúrgangur s.s. garðaúrgangur, brotajárn, timbur, bylgjupappi í umtalsverðu magni) og spilliefni eins og rafhlöður, olíur, rafgeimar og málningarafgangar o.þ.h.

Á heimasíðunni http://flokkarinn.is má finna nánari upplýsingar um þriggja flokka kerfið, innanhússlausnir í flokkun, teikningar af sorpskýlum o.fl.

Á heimasíðu Hveragerðis http://www.hveragerdi.is má finna sorphirðudagatal (hvenær tunnur eru losaðar) og upplýsingar um gámastöðina.

Byggingarreglur um sorpgeymslur og leiðbeiningar Brunamálastofnunar er að finna aftast á þessari síðu.

Nokkrar algengar spurningar og svör við þeim:

Ég bý í parhúsi (eða raðhúsi). Þurfa að vera þrjár tunnur við hverja íbúð ?
Svar: Ef eigendur hússins (húsfélag) koma sér saman um samnýtingu sorpíláta þá er það í góðu lagi. Upplýsingum um slík samkomulög skal komið til skila á afgreiðslu bæjarskrifstofunnar.
Ath. samnýting á tunnum hefur ekki áhrif á sorphirðu- eða sorpurðunargjald.

Hvar og hvernig á ég að koma tunnunum fyrir á lóðinni minni ?
Svar: Á aðaluppdráttum (afstöðumynd eða grunnmynd) er almennt gerð grein fyrir staðsetningu á sorpskýli (sorpgeymsu) á lóð. Staðsetja á sorpskýli í samræmi við aðaluppdrætti en þá má skoða hjá skipulags- og byggingarfulltrúa eða á heimasíðu bæjarins http://www.hveragerdi.is undir „ Kortagrunnur“ Ef ekki er gerð grein fyrir staðsetningu sorpskýlis á aðaluppdráttum eða staðsetningin hentar af einhverjum ástæðum ekki þá hafið samráð við skipulags- og byggingarfulltrúa um aðra staðsetningu.

Má ég staðsetja tunnur upp við húsvegg hjá mér ?
Svar: Það er ólíklegt að það samrýmist byggingarreglum vegna brunahættu.

Má ég staðsetja tunnur við lóðarmörk hjá mér ?
Svar: Ef það er út við götu þá er það líklega í lagi annars skal hafa samráð við lóðarhafa aðliggjandi lóðar.

Hvernig sorpgerði (sorpskýli) henta best ?
Svar: Til eru margar lausnir. Á heimasíðunni http://flokkarinn.is má finna teikningar af sorpskýlum. Nokkrir verktakar, smiðir og múrarar í Hveragerði bjóða upp á góðar lausnir, jafnvel skýli á föstum verðum fullfrágengin og upp sett á lóð. Á almennum markaði er einnig að finna ýmsar gerðir sorpskýla.

Hvernig kem ég í veg fyrir að tunnurnar fjúki ?
Svar: Í opnum sorpskýlum er nauðsynlegt að hafa taum, keðju eða band til að halda að tunnunum. Áríðandi er að auðvelt sé að losa og festa tauminn aftur. Finna má efni í byggingarvöruverslunum þessu til lausnar.

Hér fyrir neðan má smella á slóð að auglýsingum frá aðilum sem bjóða uppá lausnir fyrir sorptunnuskýli.

Ör tréverk
SP-verk
Karl, Guðjón & Dúddi

Byggingarreglugerð nr.441/1998 m.s.br.

84.1 Hverri íbúð skal fylgja aðgangur að sorpgeymslu og skal við það miðað að hverju húsi fylgi minnst eitt sorpílát og auk þess eitt sorpílát fyrir hverja íbúð. Gerð sorpíláta er háð samþykki heilbrigðisnefndar.

84.2 Sorpgeymslur geta annars vegar verið sorpgerði/sorpskýli á lóð og hins vegar innbyggðar sorpgeymslur í húsi eða í tengslum við það.

84.3 Sorpgerði/sorpskýli fyrir sérbýlishús sem staðsett er á lóð skulu rúma tvö sorpílát. Frí hæð fyrir ílát skal vera minnst 1,40 m og breidd 2,00 x 0,90 m. Miða skal við sömu stærðir sé sorpgeymsla fyrir sérbýlishús innbyggð í húsið.

84.4 Sorpgeymslum fyrir fjölbýlishús og önnur hús skal þannig komið fyrir að auðvelt sé að komast að þeim með þau tæki, sem notuð eru við sorphirðu.

84.5 Byggingarnefnd getur krafist þess að akfært sé að sorpgeymslu ef hún telur ástæðu til, t.d. ef um er að ræða stórt hús.

84.6 Sorpgeymslur skulu vera a.m.k. A-EI60...1 Aðeins má vera gengt í þær utan frá um læsanlegar dyr sem opnast út og eru gerðar fyrir 0,90 m breiða hurð og 2,00 m háa. Lofthæð í sorpgeymslum skal vera minnst 2,00 m.

84.7 Gólf í sorpgeymslu skal ekki meira niðurgrafið en 1,20 m. Sé gólf niðurgrafið og sorpgeymslan fyrir fleiri en 4 íbúðir skal aðkoma að sorpgeymslu vera upphituð og halli ekki meiri en 1:4.

84.8 Sorpgeymslur skulu múrhúðaðar eða þannig frá þeim gengið að auðvelt sé að þrífa þær og þvo. Þar sem fleiri en 4 íbúðir eru um sorpgeymslu skal hafa skolkrana og niðurfall í henni. Sama hátt skal hafa á, þó að færri íbúðir séu um sorpgeymslu, ef hætta er á að vatn geti safnast í geymsluna.

84.9 Sorpgeymslu skal loftræsa með ólokanlegri útiloftrist er sé músa- og rottuheld og loftræsiröri upp úr þaki.

84.10 Þar sem fleiri en 6 sorptunnur eru í sorpgeymslu getur byggingarnefnd krafist þess að geymsla eða tunnurnar séu þannig útbúnar að auðvelt sé að skipta um tunnur undir sorprennunni.

84.11 Fyrir önnur hús en íbúðarhús skal meta stærð og fjölda sorpíláta og sorpgeymslna út frá starfsemi. Í öllum húsum skal gera ráð fyrir sorpflokkun eftir því sem við á. Sé talin þörf á sérstökum sorpgámum, t.d. við verslunarhús, iðnaðarhús og vinnslustöðvar, skal staðsetning og frágangur sýndur á aðaluppdráttum.

Algengt er að sorpílát sveitarfélaga séu úr plasti. Sorpílát þessi eru 240 lítra, 13 - 17 kg að þyngd, gerð úr polyethylen og eru búin tveimur hjólum og loki. Brunamálastofnun hefur látið brenna nokkur þessara nýju sorpíláta í tilraunaskyni til að kanna hvernig þau brenna og til að meta nauðsynlegar fjarlægðir þeirra frá húsum en alloft hefur orðið tjón á húsum út frá brunum í þannig sorpílátum. Lítill munur kom í ljós á brunaeiginleikum einstakra gerða íláta sem brennd voru en þó brunnu léttari ílátin fyrr en hin þyngri.
Um sorpgeymslur gilda ákvæði gr. 84 í byggingarreglugerð nr. 441/1998. Þar segir m.a. að gerð sorpíláta sé háð samþykki heilbrigðisnefndar. Ef óskað er eftir að nota sorpílát úr plasti skal miða við eftirfarandi reglur sem taka mið af niðurstöðum ofangreindra prófana:

1. Þegar um er að ræða eitt eða tvö sorpílát skulu þau standa a.m.k. 3 m frá timburvegg en a.m.k. 2 m frá járnklæddum vegg eða vegg með yfirborð í flokki 1, og þau mega standa upp við vegg á steinhúsi. Fjarlægðin skal þó aldrei vera minni en 3 m miðað við stystu láréttu fjarlægð í glugga eða timburþakskegg en 5 m sé mælt lóðrétt.

2. Séu sorpílátin 3 eða fleiri skal miða við ofangreindar fjarlægðir að viðbættum 2 m.

3. Séu sorpílátin fleiri en 10 skal hafa þau í óbrennanlegum E30-skýlum sem opnast frá húsinu, mest 10 í hverju skýli. Sama gildir verði ofangreindum fjarlægðarreglum ekki viðkomið enda þótt sorpílátin séu færri.

4. Bannað er að nota sorpílát úr plasti innandyra, nema í sorpgeymslum sem byggðar eru í samræmi við ofangreind ákvæði byggingarreglugerðar.