Hamarshöllin verður fjölnota íþróttahöll sem hýsir gervigrasvöll og fjölnota íþróttagólf í fullri stærð. Stærð íþróttahallinnar er um 5000 m². Íþróttahöllin er upphituð úr tvöföldum dúk sem er borinn uppi af innri loftþrýstingi og loftþrýstingi á milli ytra og innra lags í útveggjum og þaki. Nú í ár verða reistir sökkulveggir og árið 2012 rís höllin og verður lagður gervigrasvöllur. Fyrirhugað er að Hamarshöllin verði fullinnréttuð árið 2013. Ákveðið hefur verið að skipta við framleiðendur frá DUOL sem bjóða mjög vönduð hús með háum gæðastuðli sem eru með Evróskri vottun samkvæmt EN stöðlum og hafa verið samþykkt af Brunamálastofnun Íslands. Áætlaður kostnaður er um 230 milljónir eða um kr 46.000 kr/m².

Hamarshöllin mun gjörbreyta aðstöðu bæjarbúa til íþróttaiðkunar og bjóða upp á fjölbreytta möguleika fyrir íþróttafólk og ferðamenn sem vilja sækja bæinn heim. Í samvinnu við íþróttahreyfingu bæjarins verður skoðað hvernig er best að nota núverandi íþróttahús og fyrirhugaða Hamarshöll en möguleikarnir eru óþrjótandi og spennandi.

Hér á síðunni má finna upplýsingar frá frummælendunum, Ara Guðmundssyni, verkfræðingi hjá VST en hann flutti erindi frá Peter Jessen, verkfræðingi sem boðaði forföll, Per Thore Nielsen, umboðsmanni DUOL í Skandinavíu, Ingu Hersteinsdóttur, brunahönnuði VSI, Lúðvíki S. Georgssyni, formanni mannvirkjanefndar KSÍ, Sturlaugi Sturlaugssyni, formanni Íþróttabandalags Akraness og Guðmundi Páli Jónssyni, bæjarfulltrúa á Akranesi.

Frummælendurnir kynntu loftborið íþróttahús eða mjúkhýsi sem hugmynd að íþróttamannvirki í Hveragerði . Fulltrúar frá Akranesi kynntu þá leið sem þeir fóru í uppbyggingu íþróttahallar.