Menningar-, íþrótta- og frísstundasvið Hveragerðisbæjar gefur út sumarblað á hverju ári. Í blaðinu má finna upplýsingar um fjölbreytt barna- og unglingastarf sem íþróttafélagið Hamar, Golfklúbbur Hveragerðis, Hestamannafélagið Ljúfur og menningartengd starfsemi bjóða upp á. 

Á sumrin er fjör í sundlauginni í Laugaskarði.  Við vonumst til að fjölskyldan verði dugleg að sækja sér þá hollu hreyfingu sem sundið er - enda frítt í sund fyrir börn og unglinga í Hveragerðisbæ til 18 ára aldurs og fyrir börn úr dreifbýli Ölfuss sem eru í grunnskólanum í Hveragerði.

Nú í sumar er mikilvægt að allir taki höndum saman og hugi að öryggismálum í sumarleikjum.  Trampolín eru orðin nokkuð algeng í görðum og er brýnt að foreldrar brýni fyrir börnum sínum aðgát og setji upp öryggisnet.  Munum líka eftir hjálmunum í sumar, hvort sem við erum á hjóli, hestbaki, línuskautum eða brettum.

Reynslan hefur sýnt að foreldrar sem taka virkan þátt í lífi barna sinna eru besta forvörnin.  Samvera foreldra og barna er afar mikilvæg og gefast mörg tækifæri til slíkra stunda á sumrin.  Góðar samverustundir fjölskyldunnar búa til góðar minningar. 

       Jóhanna M. Hjartardóttir
       Menningar- og frístundafulltrúi