Breiðumörk 27
810 Hveragerði
Sími: 483 4234
Leikskólastjóri: Sesselja Ólafsdóttir
Aðstoðarleikskólastjóri: Jónína Þórarinsdóttir.
netfang undraland@hveragerdi.is

Leikskólinn Undraland var tekinn í notkun í september 1982 með tveimur aldursskiptum deildum. Í desember 1997 var þriðja deildin opnuð. Leikskólinn er rekinn af Hveragerðisbæ en Sveitarfélagið Ölfus hefur aðgang að leikskólaplássum skv. samningi.
Stefnur leikskólans.
Námskrá leikskólans Undralands mótast af þeim áherslum sem lagðar eru í Aðalnámskrá leikskóla. Leikskólinn leggur áherslu á náttúruna og umhverfið. Umhverfismennt tengist í alla námsþætti leikskólans.
Sú hugmyndafræði sem liggur að baki markmiðum Undralands eru kenningar Bandaríska heimspekingsins John Dewey. Hann taldi reynslu vera undanfara menntunar og uppsprettu þeirra spurninga sem nám byggir á. Athafnaþörf barnsins þarf því að virkja og það lærir af eigin reynslu og virkni. Skapa þarf örvandi uppeldisumhverfi og hafa aðgengilegan efnivið. Kennarinn hvetur barnið, spyr opinna spurninga og leiðir það áfram til eigin niðurstöðu.

Markmið leikskólans
Í leikskólanum er lögð áhersla á að efla félagsfærni og styrkja sjálfsmynd barnanna. Ennfremur að finna leiðir til að skapa umhverfi og aðstæður sem virkja sköpunargleði, stuðla að góðu félagslegu andrúmslofti í vel skipulögðu umhverfi svo börn og starfsfólk fái notið sín.

Stefnur í starfi Undralands.
Námsskrá leikskólans mótast af þeim áherslum sem lagðar eru í Aðalnámsskrá leikskóla. Við leitumst við að hafa uppeldisstefnu John Dewey að leiðarljósi ásamt kenningum Loris Malaguzzi, sem kenndar eru við heimaborg hans Reggio Emilia á Ítalíu.
Bandaríski heimspekingurinn John Dewey er best þekktur fyrir kenningar sínar um menntun og skólastarf. Í kennigum hans er unnið út frá því að reynsla sé undanfari menntunar og uppspretta þeirra spurninga sem nám byggir á, þ.e. að barnið læri af eigin reynslu og virkni. Nám barnsins á að vera ein heild, en reynsla, tilraunir, hæfileikinn til að meta og samvinna styrkja og efla barnið í þekkingarleit sinni. Skapa þarf barninu örvandi uppeldisumhverfi með sýnilegum og aðgengilegum efniviði. Kennarinn hvetur barnið, spyr opinna spurninga og leiðir það áfram til eigin niðurstöðu.
Út frá hugmyndum Dewey setti Loriz Malaguzzi saman kenningar sínar og í þeim er þemavinna stór þáttur í námi barnanna og er Malaquzzi að vissu leyti frumkvöðull í þróun á sviði leikskólamála. Í þemavinnu er lögð áhersla á skapandi og fræðandi starf þar sem fræðsla um umhverfið er tengd við aðra listsköpun. Reynt er að virkja ímyndunarafl barnanna með hversdagslegum hlutum, en það er mikilvægur þáttur í að gera börnin meðvitaðri um umhverfi sitt. Rauði þráðurinn í hugmyndafræði Malaquzzi er sjónrænt uppeldi, sem er andstæða þess að börnin séu mötuð og óvirkir þiggjendur. Lögð er áhersla á að hvetja barnið til virkrar og skapandi hugsunar. Með alhliða þjálfun skynjunar og tilfinninga eykst sjálfsvitund og trú á eigin getu.
Leikurinn er aðalnámsleið leikskólabarnsins. Í gegnum leikinn fær barnið tækifæri til að tjá reynsluheim sinn og kynnast reynslu annara. Námsvið samkvæmt Aðalnámskrá fléttast saman við frjálsan leik og mynda samfellu í leikskóladegi barnsins.
Lagður er metnaður í gott samstarf leik og grunnskóla. Gott samstarf leiðir af sér öruggari nemendur þegar þau flytjast á milli skólastiga. Félagsfærni elstu nemendanna er efld með lífsleikniæfingum og grunnurinn að komandi lestrar og stærðfræðinámi er lagður.

Nánar má lesa um leikskólann í Skólanámskrá skólans.

Gjaldskrá leikskóla

Reglur um innritun og innheimtu leikskólagjalda