Undanfarin ár hefur Hveragerðisbær í samvinnu við Lýðheilsustöð unnið að heilsueflingu bæjarbúa undir yfirskriftinni, Allt hefur áhrif einkum við sjálf.

Markmið verkefnisins er að stuðla að heilbrigðum lífsháttum barna, ungs fólks og fjölskyldna þeirra með áherslu á aukna hreyfingu og bætt mataræði. Skólastofnanir, íþrótta- og tómstundahreyfingar, heilsugæsla og foreldrasamtök eiga fulltrúa í starfshópi sem skipuleggur ferla til að virkja þátttakendur til heilbrigðari lífsstíls. Verkefnastjóri Lýðheilsustofnunar, Jórlaug Heimisdóttir, er ráðgjafi starfshópsins. Þegar verkefnið hófst árið 2005 var gert átak í að bæta næringu barna og unglinga í skólastofnunum bæjarins. Einnig var gerð rannsókn á lífsháttum barna og ungmenna bæjarins.

Á næstu árum horfum við til þess að efla verkefnið til muna og auka kynningu á hreyfingu og útiveru almennings. Í Hveragerði eru miklir möguleikar á að stunda fjölbreytta hreyfingu úti í okkar fallegu náttúru. Margar merktar gönguleiðir er að finna á heimasíðu bæjarins og einnig er fjölnota íþróttahringur staðsettur við enda Hamarsvallar.

Forvarnaráætlun Hveragerðisbæjar - endurskoðun
Tilgangurinn er að stuðla að víðtækri og skiplagðri lýðheilsuáætlun fyrir bæjarbúa með því að til sé heildræn velferðarstefna í bæjarfélaginu og að tryggja samvinnu þeirra sem koma að málefnum m.a. barna og ungmenna í bæjarfélaginu t.d. skóla, frístunda- og íþróttafélaga, félagsmiðstöðvar og kirkju.
Hlutverk
- er að samhæfa og styrkja enn frekar það lýðheilsustarf sem unnið er í bæjarfélaginu.
- er að vinna að jákvæðum árangri í velferð barna og ungmenna.
- er að tryggja samvinnu og samheldni í velferðarstarfinu.
- er að ákveðinn samhljómur sé ríkjandi varðandi velferð barna og ungmenna.
- er að tryggja börnum jákvætt og uppbyggilegt umhverfi hvort sem er í skóla eða frítíma.

Fyrirhugað er að halda heilsudaga, Heilsuþristinn, í júní ár hvert sem hvatningu fyrir almenning að hreyfa sig til að bæta heilsu og vellíðan. Nánari upplýsingar koma síðar.

Íþróttamannvirki bæjarins
Yfirmaður íþróttamannvirkja er menningar- og frístundafulltrúi jmh@hveragerdi.is

Sundlaugin Laugaskarði

Laugaskarði
810 Hveragerði
Sími: 483 4113

Opnunartími:

Mánud.- fimmtud. kl. 7:00 - 20:30
Föstudaga kl. 7:00 - 17:30
Laugard.- sunnud. kl. 10:00-17:30.

Gjaldskrá frá og með 1. janúar 2011
Fullorðnir kr. 400
Börn kr. 160
10 miða afsláttarkort fullorðnir kr. 2.800
10 miða afsláttarkort börn kr. 800
30 miða afsláttarkort fullorðnir kr. 6.200
6 mánaða kort kr. 13.000
Árskort kr. 25.000
Baðföt, leiga kr. 350

Frítt er í sund fyrir alla íbúa yngri en 18 áraog öll börn úr dreifbýli Ölfuss sem eru í Grunnskólanum í Hveragerði.

Sundlaugin í Laugaskarði er 50 metra löng og 12 metra breið og var um langa hríð langstærsta sundlaug landsins. Hún er svokölluð gegnumrennslislaug, hituð upp með jarðgufu, sem tryggir eðlilegt sýrustig og hreinleika vatnsins. Laugin er í skjólsælli hvilft sem veit gegn suðri, norðan Varmár við veginn að Garðyrkjuskóla ríkisins að Reykjum í Ölfusi.

Gæslumaður er ávallt á vakt við laugina og auk þess er sjónvarpskerfi til að fylgjast með og tryggja öryggi sundlaugargesta. Þar er heit, grunn setlaug, heitur pottur með rafmagnsnuddi og náttúrulegt gufubað.

Laugin var byggð í tveimur áföngum, sá fyrri var 25x12 metrar og var tekinn í notkun árið 1938, en síðari hlutinn árið 1945. Í henni æfði íslenska landsliðið í sundi allt til 1966 þegar Laugardalslaugin í Reykjavík kom til sögunnar.

Það var Ungmennafélag Ölfushrepps sem beitti sér mest fyrir því að laugin var gerð og lögðu félagsmenn fram ómælda sjálfboðavinnu. Þeim bættist góður liðsauki þegar Lárus Rist sundkappi fluttist til Hveragerðis árið 1936 og má segja að hann hafi tekið forystu við uppbyggingu laugarinnar og réði meðal annars staðarvali.

Hveragerðisbær annast allan rekstur og viðhald laugarinnar.

Íþróttahús Hveragerðis

við Skólamörk
810 Hveragerði
Sími: 483 4348

Stærð íþróttasalarins er 18x33 metrar, áhorfendastæði eru fyrir 240 manns og þar eru búnings- og baðklefar.

Húsið var byggt í tveimur áföngum og var fyrri áfangi tekinn í notkun 1976 en síðari áfangi 1984. Undir hálfu húsinu er kjallari með fjögurra metra lofthæð og þar er nú félagsmiðstöð fyrir grunnskólanema. Lægri kjallari undir hinum helmingnum er nýttur sem geymsla.

Grunnskólinn í Hveragerði hefur afnot af húsinu á skólatíma til leikfimi og íþróttakennslu. Að skóla loknum hefur Íþróttafélagið Hamar afnot af húsinu og þar fer fram fjölbreytt íþróttastarf á vegum Hamars. Hveragerðisbær styrkir félagið með ókeypis afnotum af húsinu.

Íþróttafélagið Hamar

stendur fyrir íþróttaæfingum í badmintoni, blaki, fimleikum,knattspyrnu, körfuknattleik og sundi. Markmið íþróttafélagsins er að stuðla að eflingu íþrótta- og æskulýðsstarfs, í Hveragerði og nágrenni, sem og heilbrigðs lífernis. Sjá nánari upplýsingar á heimasíðu félagsins sem er á forsíðu.

Önnur félög

Fleiri félög eru starfandi eins og Golfklúbbur Hveragerðis, www.golf.is, Hestamannafélagið Ljúfur, www.ljufur.is , Skátafélagið Strókur og Hjálparsveit Skáta, www.123.is/hssh