Útisýning Listvinafélagsins sett upp

skrifað 25. júl 2016
Útisýning ListvinafélagsinsÚtisýning Listvinafélagsins

"Listamannabærinn Hveragerði" er viðamikil útisýning sem sett verður upp í Listigarðinum Fossflöt á næstu dögum af Listvinafélagi Hveragerðis en gert er ráð fyrir að sýningin opni formlega föstudaginn 12. ágúst kl. 16 (Blómstrandi dagar).


Listamannabærinn Hveragerði er sýning sem hönnuð er af Guðrúnu Tryggvadóttur myndlistarmanni og fyrrv. formanni Listvinafélagsins í Hveragerði Föstudaginn 12. ágúst kl. 16 (Blómstrandi dagar) er gert ráð fyrir að fyrsti áfangi sýningarinnar verði opnaður gestum í Listigarðinum Fossflöt.

Listvinafélagið hefur þegar sett upp farandsýningu þar sem sex rithöfundum sem settust að í Hveragerði í árdaga byggðar voru gerð skil. Þeir voru: Kristján frá Djúpalæk, Jóhannes úr Kötlum, Kristmann Guðmundsson, Valdís Halldórsdóttir, Gunnar Benediktsson og séra Helgi Sveinsson. Á hinni nýju sýningu sem sett verður upp í Lystigarðinum í Hveragerði í ágúst á þessu ári eru fleiri listamenn teknir fyrir þ.e. tónsmiðurinn Ingunn Bjarnadóttir og myndlistarmennirnir Kristinn Pétursson og Höskuldur Björnsson. Auk þess sem lifandi gallerí mun fjalla um eldri og yngri listamenn allra listgreina en sá hluti verður settur upp sumarið 2017.

Sýningin felst í 9 glerflekum þar sem verkum listamannanna og lífshlaupi verður gerð skil á myndrænan og skemmtilegan hátt. Hugmyndin að sýningunni hefur verið kynnt m.a. í Listasafni Árnesinga á síðasta ári.

Hveragerðisbær ákvað í tilefni af 70 ára afmæli bæjarins að styrkja Listvinafélag Hveragerðis um 3 mkr til gerðar sýningarinnar en unnið hefur verið að henni um nokkurn tíma.

Bæjrstjóri.

Heimasíða Listvinafélagsin er afar áhugaverð og full ástæða til að hvetja alla til að kynna sér merka sögu Listamannabæjarins Hveragerðis. <www.listvinir.is>