Grunnskólinn hlaut umhverfisverðlaunin

skrifað 24. apr 2012
R_IMG_0090 (2)R_IMG_0090 (2)

Umhverfisverðlaun Hveragerðisbæjar voru afhent við hátíðlega athöfn á Sumardaginn fyrsta. Það var Grunnskólinn í Hveragerði sem hlaut verðlaunin þetta árið en starfsfólk og nemendur hafa undanfarin ár unnið markvisst að umhverfismálum og á fullveldisdaginn þann 1. desember s.l. afhenti fulltrúi Landverndar Grunnskólanum í Hveragerði Grænfánann sem tákn um framúrskarandi starf að umhverfismálum í skólanum.

Í máli Unnar Þormóðsdóttur, formanns bæjarráðs við afhendingu verðlaunanna kom fram að umhverfismál hafa ávallt skipt miklu máli en í nútíma samfélagi er lífsspursmál að gjörðir okkar spilli ekki umhverfi og möguleikum komandi kynslóða til að njóta þeirra gæða sem náttúran hefur gefið okkur öllum. Það er grundvallaratriði í umhverfismálum að börn og ungmenni séu alin upp við meðvitund um að jafnvel hin minnstu atriði skipta máli þegar kemur að umhverfismálum

Innan Grunnskólans hafa Garðar Árnason og Ari Eggertsson, kennarar, borið hitann og þungann af undirbúningi Grænfánans en svona viðurkenning er afrakstur umfangsmikillar undirbúningsvinnu og mikils vinnuframlags allra sem að verkefninu hafa komið. Það var forseti Íslands hr. Ólaf Ragnar Grímsson sem venju samkvæmt afhenti umhverfisverðlaun Hveragerðisbæjar árið 2012.

Myndina tók Guðríður Helgadóttir en á henni má sjá þá Ara, Garðar, Guðjón skólastjóra, hr. Ólaf Ragnar Grímsson og Unni formann bæjarráðs.