Samið um tryggingar við VÍS

skrifað 17. júl 2018
Samningur um tryggingar VÍSSamningur um tryggingar VÍS

Umtalsverður sparnaður, eða um 2,5m.kr. náðist við útboð á vátryggingum bæjarfélagsins nú nýverið. VÍS var lægstbjóðandi og nú þegar hefur verið skrifað undir nýjan samning um vátryggingarnar.

Á fundi bæjarráðs nýverið var samþykkkt að ganga til samninga við VÍS um allar vátryggingar bæjarfélagsins. Var þessi ákvörðun tekin í kjölfar útboðs sem fram fór á vegum ráðgjafarfyrirtækisins Consello. Consello réðst í úttekt á öllum tryggingum bæjarfélagsins og nýtti bæjarráð tæikfærið á fundi sínum og þakkaði Consello ehf gott samstarf við yfirferð vátrygginga bæjarins og gerð útboðsgagna.

Í bókun bæjarráðs kom fram að með þessari vinnu hafi tekist að bæta vátryggingavernd bæjarfélagsins umtalsvert en jafnframt að ná fram góðum sparnaði en lægsta tilboð VÍS hljóðaði upp á 10.525.805,-. Núverandi iðgjöld námu 13.053.504,- og því hefur útboðið skilað hagræðingu sem nemur ríflega 2,5 mkr.

Það var álit ráðgjafa að niðurstaða útboðsins væri góð fyrir Hveragerðisbæ og því hefur bæjarstjóri nú þegar skrifað undir nýjan samning við VÍS um tryggingavernd sveitarfélagsins.

Á myndinni má sjá Rúnar Guðjónsson, VÍS, Guðmund Ásgrímssonfrá Consello ásamt bæjarstjóra við undirritunina.