Öldungaráð skipað í Hveragerði

skrifað 20. nóv 2014
Starf Félags eldri borgara er afar fjölbreytt og skemmtilegt.  Hér má sjá Björgu Einarsdóttur, Kristínu Egilsdóttur, sr. Tómas Guðmundsson og Önnu Sveinbjörnsdóttir. Starf Félags eldri borgara er afar fjölbreytt og skemmtilegt. Hér má sjá Björgu Einarsdóttur, Kristínu Egilsdóttur, sr. Tómas Guðmundsson og Önnu Sveinbjörnsdóttir.

Bæjarstjórn Hveragerðisbæjar hefur samþykkt að skipa öldungaráð í bæjarfélaginu.

Í samþykktum um ráðið kemur fram að öldungaráð sem skipað er með formlegum hætti af bæjarstjórn Hveragerðisbæjar muni vinna að málefnum aldraðra í Hveragerði samkvæmt lögum um málefni aldraðra.

Meginmarkmið með öldungaráði er að Félag eldri borgara í sveitarfélaginu hafi formlegan og milliliðalausan viðræðuvettvang við sveitastjórnarmenn um hagsmunamál sín.

Í öldungaráði eru rædd öll atriði sem varða hagsmuni eldri borgara í sveitafélaginu svo sem þjónusta sveitarfélagsins við eldri borgara, aðstaða félags eldri borgara og fjárhagsáætlun hvers árs hvað félag eldri borgara varðar.
Helstu markmið eru:

  • Öldungaráð stuðlar að skoðanaskiptum eldri borgara og kjörinna fulltrúa um stefnu og framkvæmd málefna eldri borgara í Hveragerði og að þeim verði framfylgt.

  • Öldungaráð stuðlar að heilbrigðri öldrun og sjálfstæðu lífi.

  • Öldungaráð stuðlar að aukinni samstöðu milli kynslóða til að skapa samfélag fyrir alla aldurshópa.

  • Öldungaráð leitast við að tryggja að aldraðir fái þá þjónustu sem þeir þarfnast.

  • Öldungaráð hefur að leiðarljósi markmið laga um málefni aldraðra.

  • Öldungaráð gerir tillögur til bæjarstjórnar um öldrunarmál.

Í samþykktunum kemur einnig fram að öldungaráð sé ekki framkvæmdaaðili, heldur beitir það sér fyrir að mál sem tekin eru fyrir hjá ráðinu séu framkvæmd af hálfu bæjarins.

Félag eldri borgara í Hveragerði mun tilnefna 3 fulltrúa í ráðið en fyrir liggur að það verða þær Hrafnhildur Björnsdóttir, Kristín Dagbjartsdóttir og Guðlaug Birgisdóttir.

Bæjarstjórn hefur þegar skipað sína tvö fulltrúa þá Örn Guðmundsson og Gísla Garðarson.

Pálína Snorradóttir, Egill Gústafsson, Laufey S. Valdimarsdóttir og Auður Guðbrandsdóttir hlutu viðurkenningu frá Félagi eldri borgara árið 2013 fyrir störf sín í þágu félagsins.