Göngubrú yfir Hengladalaá og breytt sveitarfélagamörk

skrifað 07. ágú 2015
Capilano-Suspension-Bridge-Vancouver-018Capilano-Suspension-Bridge-Vancouver-018

Óskað hefur verið eftir samstarfi við Sveitarfélagið Ölfus um hönnun og fjármögnun nýrrar brúar yfir Hengladalaá (við upphaf gönguleiðar inn Reykjadal) þannig að gera megi ráð fyrir framkvæmdinni við gerð fjárhagsáætlunar 2016.

Bæjarstjóri lagði fram minnisblað á fundinum þar sem fram kom að fjöldi ferðamanna sem sækir Reykjadalinn heim hefur aukist gríðarlega í sumar. Sem dæmi má nefna að kl. 14:30 laugardaginn 1. ágúst voru 150 bílar staddir á bílastæðinu við Dalakaffi og 2 stórar rútur.

Einnig kom fram í minnisblaðinu að ljóst er að staurabrúin yfir Hengladalaá var lögð þar til bráðabirgða, hún er hallandi og skökk, það vantar í hana gólfborð og á henni er ekkert handrið. Það er brýnt að þegar í stað verði hugað að nýrri brú sem gæti með góðri hönnun orðið að skemmtilegu upphafi þessarar vinsælu gönguleiðar.

Auk þess samþykkti bæjarráð á sama fundi að óska eftir því að gerð verði lagfæring á sveitarfélagamörkum Hveragerðis og Sveitarfélagsins Ölfuss með það að markmiði að spildan ofan Varmár og að fjallsrótum tilheyri Hveragerðisbæ.

Á meðfylgjandi mynd má sjá skemmtilega útfærslu á göngubrú.