Gjaldtaka á Hverasvæðið - til uppbyggingar

skrifað 31. okt 2013
Gjaldtaka á Hverasvæðið - til uppbyggingar

Hverasvæðið hefur verið mikið í fréttum í dag 31. október í tengslum við gjaldtöku á ferðamannastaði. Í bændablaðinu birtist frétt þar sem vitnað er í Aldísi frá málþingi sem haldið var 23. október síðastliðnum og bar yfirskriftina „Sunnlensk ferðaþjónusta – tölum saman“. Þar er sagt að gestum hafi fækkað um 10 þúsund eftir að gjaldtaka hófst á Hverasvæðinu. Þarna er verið að taka orð úr samhengi. Það er ekki rétt að gestum hafi fækkað eftir að gjaldtaka hófst – heldur má segja að veðurguðinn hafi átt þátt í að færri ferðamenn hafi almennt komið til Hveragerðis. Sumarið var kalt og votviðrasamt á Suðurlandi og hafði það áhrif víða.

Það kom varla fyrir að gestir hættu við heimsókn í Hveragarðinn vegna gjaldtökunnar. Árið 2012 komu um 22 þúsund gestir í Hveragarðinn sem var metár og hefur aldrei verið jafnmikil aðsókn. Gert var ráð fyrir að heimsóknum gæti fækkað um helming í áætlunum fyrir árið 2013 vegna gjaldtökunnar. Í lok október hafa um 10500 gestir komið í garðinn þannig að lítið vantar uppá til að standast áætlun. Tekjurnar sem koma inn af aðgangseyrinum verða notaðar til viðhalds, fegrunar og til frekari uppbyggingar svo sómi sé af.

Spurning er hvort hlutirnar hafi verið teknir svona úr samhengi til að sýna framá andstöðu við gjaldtöku á Geysissvæðinu, þ.e. að gestum ætti eftir að fækka gríðarlega. Sumarið hefur sýnt sig að svo er ekki og er Hveragerðisbær stoltur af því að hafa riðið á vaðið með að rukka inná vinsæla áningarstaði ferðamanna eins og víða er gert erlendis til að þjónustan verði sem allra best og um leið verndað enn betur náttúruminjar.

Sigríður Hrönn Gunnarsdóttir, forstöðumaður Upplýsingamiðstöðvar Suðurlands / Tourist Information Center