Gisting á almannafæri bönnuð frá 2009

skrifað 15. jún 2016

Samkvæmt 10. grein lögreglusamþykktar Hveragerðisbæjar nr. 579/2009 er eigi heimilt að gista í tjöldum, húsbílum, hjólhýsum og tjaldvögnum á almannafæri í sveitarfélaginu utan sérmerktra svæða.

Í ljósi ofangrieindrar samþykktar hefur Hveragerðisbær í samningum sínum við leigjendur tjaldsvæðanna í Hveragerði gert þeim heimilt að innheimta gjald af öllum þeim gestum bæjarins sem gista utan merktra tjaldsvæða og að einhverjum ástæðum hafa ekki kost á að færa sig inná tjaldsvæðin. Gjaldið er það sama og í gildi er á tjaldsvæðum bæjarfélagsins.

Hafa umsjónarmenn tjaldsvæðanna keyrt um bæjarfélagið á hverjum degi og bent þeim sem hafa sett upp tjöld eða annan viðlegubúnað á að flytja sig á viðurkennd tjaldsvæði eða greiða gjald að öðrum kosti.