Framkvæmdir við Hamarshöll komnar í gang

Framkvæmdir við byggingu Hamarshallarinnar eru nú komnar í fullan gang. Samið hefur verið við Trésmíðar Sæmundar ehf. um uppsteypu á undirstöðum og gólfum ásamt öðrum frágangi við höllina. Gólfefnin í höllina, gervigras og boltagólf hafa nú þegar verið boðin út og er lægstbjóðandi fyrirtækið Sport-Tæki ehf, sem staðsett er í Hveragerði. Áætlað er að allri uppsteypu og lagningu gervigrass ljúki í maí nk.

Yfirbyggingin sem er tvöfaldur loftborinn dúkur, verður svo væntanlega blásin upp í júlí nk. Gert er ráð fyrir að höllin verði fullfrágengin með boltagólfi, aðstöðuhúsi og öðrum frágangi í september nk. Samhliða byggingu hallarinnar verður lagður malbikaður göngustígur frá Laufskógum að íþróttasvæðinu norðan Hamars.

Meðfylgjandi eru myndir ,sem teknar voru á byggingarstað og á skýringafundi með lægstbjóðanda í gólfefnin.