Fjölmenni reisir Hamarshöllina

skrifað 04. júl 2012
Dúkurinn dreginn yfir völlinn.Dúkurinn dreginn yfir völlinn.

Það ríkti gleði og mikið fjör í hópnum sem mætti í vinnu við nýju Hamarshöllina kl. 17 í gær, þriðjudag. Fjöldi einstaklinga á öllum aldri dreif að og var mæting sjálfboðaliða framar öllum vonum. Verkefnið fólst í að draga út hallardúkinn og að koma honum á rétta staði en hann er níðþungur og því þarf fjölmenni til að færa hann úr stað. Það var einstök sjón að verða vitni að því þegar tugir einstaklinga raðaði sér á kantinn og hljóp síðan með dúkinn á fullri ferð yfir völlinn. Smám saman færðist hvítur litur yfir svæðið sem á allra næstu dögum mun breytast í eitt glæsilegasta íþróttasvæði landsins.

Þegar dúkurinn er kominn í réttar skorður þarf að bolta saman hlutana og var sjálfboðaliðahópurinn orðinn ótrúlega sjóaður í þeim vinnubrögðum þegar vinnu lauk á tíunda tímanum í gærkvöldi. Haft var á orði að stemningin hefði verið eins og á góðum réttardegi, fjör, gleði og hlátrasköllin glumdu um allt svæðið. Flestir hafa hug á að mæta aftur í dag kl. 17 en þá verður klárað að setja upp dúkinn.

Þeir erlendu aðilar sem hafa yfirumsjón með verkinu eru yfir sig hrifnir og hafa sjaldan ef nokkurn tíma orðið vitni að viðlíka viðbrögðum hjá bæjarbúum þar sem þessi hús hafa verið sett upp. Við getum verið stolt af hópnum okkar Hvergerðingar og um helgina getum við öll séð afrakstur erfiðisins þegar húsið verður fyllt af lofti og íþróttahúsið verður loksins staðreynd.

Þeir sem hafa hug á að mæta í dag koma á svæðið kl. 17. Vinnuvettlingar eru ágætir og sólgleraugu nauðsyn enda endurkastið frá dúknum ansi mikið :-)

Aldís Hafsteinsdóttir Bæjarstjóri

Meðfylgjandi myndir tók Valdimar Thorlacius.

Plastað yfir gólfið áður en dúkurinn var dreginn yfir.