Aukið öryggi í Reykjadal

skrifað 19. nóv 2012
Bera þarf allt efni inní dalinn sem getur verið ansi strembið verk. Bera þarf allt efni inní dalinn sem getur verið ansi strembið verk.

Unnið hefur verið að ýmsum úrbótum sem lúta að auknu öryggi ferðamanna í Reykjadal á undanförnum mánuðum. Í sumar vann Guðni Tómasson að bættum göngustígum, breikkaði og lagaði halla á ýmsum stöðum í dalnum.

Unnið var að uppsetningu hestagerðis innst í dalnum en eins og flestir vita er hestaumferð töluverð um dalinn sem er afar vinsæll áfangastaður ferðamanna og því mikilvægt að svæði séu skilgreind fyrir geymslu hrossa á meðan gestir staldra við í dalnum.

Félagar í Hjálparsveit skáta í Hveragerði hafa unnið afar vel að þessu verkefni, sett niður fleiri stikur við stíginn sem til stendur að númera og nú um liðna helgi unnu félagar í sveitinni að uppsetningu fjögurra brúa yfir heita lækinn. Héðan í frá ættu ferðamenn að geta farið um Reykjadal án þess að eiga á hættu að slasa sig við það að stikla eða hoppa yfir lækinn en það hefur verið ein helsta slysagildra göngumanna á þessari leið.

Efnið var flutt síðastliðið sumar inní Reykjadal með þyrlu þar sem aðkoma vélknúinna ökutækja er nær ógerleg á þessari leið. Landhelgisgæslan sá um þann flutning og eru starfsmönnum þar færðar bestu þakkir fyrir.

Úrbætur í Reykjadal eru styrktar af framkvæmdasjóði Ferðamálastofu en aðilar að verkefninu eru Sveitarfélagið Ölfus, Hveragerðisbær, Landbúanaðarháskóli Íslands og Eldhestar.

Á meðfylgjandi myndum má sjá undirbúning að brúarsmíðinni og aðgerðir síðustu helgar. Myndirnar eru teknar af Lárusi Kristni Guðmundssyni, formanni Hjálparsveitar skáta í Hveragerði.

Brúarsmíði hefst. Sverar undirstöður þarf undir brýrnar. Unnið að brúarsmíði. Stoltur hópur að loknu vel unnu verki. Brýrnar falla vel inní umhverfið. Landhelgisgæslan flytur efni í dalinn. Spurning hvort þetta sé of þungt fyrir þyrluna :-)Lagt af stað...