Björgvin Karl íþróttamaður Hveragerðis 2014

skrifað 30. des 2014
Björgvin Karl er íþróttamaður Hveragerðis 2014Björgvin Karl er íþróttamaður Hveragerðis 2014

Björgvin Karl Guðmundsson lyftingamaður og keppandi í crossfit var kjörinn íþróttamaður Hveragerðis 2014 í hófi menningar-, íþrótta- og frístundanefndar í Listasafni Árnesinga í lok ársins.

Björgvin er vel að titlinum kominn en hann hefur verið farsæll íþróttamaður á árinu en hann setti þrjú Íslandsmet í ólympískum lyftingum á Reykjavíkurleikunum 2014, í snörun, jafnhöttun og í samanlögðum árangri og á sumarmóti LSÍ bætti hann aftur Íslandsmetið í snörun. Björgvin keppir einnig í crossfit og hefur árangur hans verið frábær bæði í keppni innanlands og á erlendum grundum undanfarin ár. Björgvin er Íslandsmeistari í crossfit annað árið í röð og var í 3. sæti í Evrópumótinu í crossfit. Hann vann sér inn rétt til að keppa á heimsleikunum í crossfit en aðeins 50 bestu komast að og lenti Björgvin í 26. sæti.

Einnig var Björgvin valinn í lið Evrópu í liðakeppni í Crossfit gegn Ameríku, Canada og Ástralíu og var liðið í þriðja sæti aðeins 1 stigi á eftir Canada sem var í 2. sæti.

Það var glæsilegur hópur íþróttamanna sem tóku við viðurkenningum fyrir góðan árangur í sínum greinum en 14 íþróttamenn voru í kjöri íþróttamanns Hveragerðis auk þess fengu 6 íþróttamenn viðurkenningu fyrir Íslandsmeistaratitil á árinu.

Glæsilegur hópur íþróttamanna tók við viðurkenningum fyrir góðan árangur á árinu