Allir velkomnir á bæjarhátíðina, Blómstrandi daga

skrifað 28. júl 2014
Brenna, flugeldasýning og brekkusöngur með IngóBrenna, flugeldasýning og brekkusöngur með Ingó

Frábær dagskrá komin í loftið fyrir alla fjölskylduna dagana 14. - 17. ágúst. Alla helgina verður líf og fjör og hátíðarstemning yfir bænum.

Á laugardeginum verður Ísdagurinn mikli hjá Kjörís en þá er öllum Íslendingum boðið upp á ís í miklum mæli. Skemmtidagskrá verður á Kjörísplaninu þar sem Ingó, Lína langsokkur og fleiri gestir leika og syngja. Einnig verður fjölbreytt fjölskyldudagskrá á Fossflöt alla helgina þar sem m.a. lifandi bréfdúfur verða til sýnis í opnum búrum, Hljómlistarfélag Hveragerðis verður með Norðurlandameistaramót í limbó, Brúðubíllinn kemur í heimsókn og leikhópurinn Lotta sýnir Hróa hött og Þyrnirósu. Fornbílar verða áberandi í bænum og munu bílarnir verða til sýnis við íþróttahúsið á laugardeginum. Ýmis leiktæki verða í bænum fyrir þá sem þora eins og aparólan yfir Reykjafoss, wibit þrautabraut í sundlauginni, veltibíllinn, vatnabolti, bubblebolti, hoppukastalar, tívolí og margt margt fleira.

Tónlistarveisla við allra hæfi

Tónlistin skipar stóran sess á hátíðinni og munu margir glæsilegir tónlistarmenn stíga á stokk eins og Hljómsveitin Ylja sem hefur verið að gera það gott víða erlendis að undanförnu og má enginn láta þessa tónleika fram hjá sér fara, Matti Matt og Pétur rokka í Eden, Bergþór Pálsson og Brynhildur Guðjónsdóttir syngja vel þekkta franska slagara m.a. Edith Piaf lög. Grínistinn og uppistandarinn Þorsteinn Guðmundsson kitlar hláturtaugarnar og ekki má gleyma okkar frábæra blúsbandi Lucy in blue. Hljómsveitin Stuðlabandið leikur á blómadansleik á Hótel Örk á laugardagskvöldinu og verður krýnd blómadrottning. Hápunktur laugardagsins er brekkusöngurinn í Lystigarðinum en þar stýrir Ingó Veðurguð brekkusöng og mun flugeldasýningin verða stórglæsileg í ár.

Fjölbreyttar sýningar og markaðir

Ýmsar sýningar verða þessa daga. Í Listasafni Árnesinga stendur yfir sumarsýningin, Snertipunktar. Á sýningunni má sjá fjölbreytt verk eftir sjö íslenska myndlistarmenn sem fæddir eru á árunum 1948-1966. Í Bókasafninu, Sunnumörk, verður hinn árlegi bókamarkaður. Einnig mun Ævar vísindamaður koma fram á uppskeruhátíð sumarlestrar. Í Þorlákssetri, húsi eldri borgara verður vatnslitamyndasýning Sæunnar Grímsdóttur og bókmenntadagskrá. Myndlistarfélag Árnesinga verður með sýningu í leikfélagshúsinu við hliðna á Eden. Í Garðyrkjustöð Ingibjargar verður blómamarkaður og á laugardeginum verður kynning og sala á heilsuvörum. Ingibjörg býður gestum upp á kaffi og kleinur frá kl 15. Á uppistandandi veggjum í Eden er myndskreytingasýning Örvars Árdal og einnig verður markaðs- og skottsala á planinu við Eden frá kl. 13 - 17 og eru allir velkomnir að koma með bílinn og selja úr skottinu eða stilla upp borði eða slá. Tískusýningin verður á sínum stað og grænmetismarkaður verður á leikhúsplaninu við hliðina á Eden. Hjálparsveit skáta sýnir hjálparbílaflota sinn og verður öllum boðið að spreyta sig í kassa- og turnklifri.

Fjölmörg fyrirtæki, stofnanir, félög og einstaklingar leggja sitt af mörkum til að gera dagskrá bæjarhátíðinnar fjölbreytta og skemmtilega. Bæjarbúar leggja hátíðinni lið með því að skreyta sitt hverfi og sinn garð. Kort yfir litaskiptinguna er að finna á http://www.hveragerdi.is/ . Viðurkenningar verða veittar fyrir fallegustu og frumlegustu skreytingarnar bæði hjá fyrirtækjum og heimilum. Einnig fá litríkustu bæjarbúarnir viðurkenningu. Viðurkenningarnar verða afhentar á kvöldvökunni á Fossflöt 16. ágúst.

Nánar um viðburði 2014 undir myndunum

Góða skemmtun

Jóhanna M. Hjartardóttir menningar- og frístundafulltrúi

Hljómsveitin YljaMyndskreytingar á veggjum EdenStrákarnir í Lucy in blueVið munum líka hreyfa okkur Þrautabrautin í sundlauginni fyrir alla kátaAllskonar ís til að smakkaTískusýning í Eden eins og í Glæsilegir fornbílar verða í bænum