ANDANS KONUR Gerður Helgadóttir ∙ Nína Tryggvadóttir París – Skálholt

skrifað 03. júl 2009

Sunnudaginn 5. júlí kl. 15 verður sýningin ANDANS KONUR Gerður Helgadóttir, Nína Tryggvadóttir, París - Skálholt opnuð í Listasafni Árnesinga. Útgangspunktur sýningarinnar er fundur þessara öflugu listakvenna í Skálholti, á sviði gler- og mósaíklistar. Ennfremur er tímabilinu þegar þær voru báðar búsettar í París gerð skil, til skýringar á ferli þeirra og viðfangsefnum á þessum mótandi tíma fyrir Skálholtsverkefnið. Að lokum er efnið víkkað út og spurningin um viðhorf þeirra til andlegra efna tekin fyrir, með verkum sem tengjast andlegri leit og þroska. Sýningarstjóri er Ásdís Ólafsdóttir listfræðingur sem er búsett í París. Nína Tryggvadóttir (1913-1968) og Gerður Helgadóttir (1928-1975) voru meðal frumkvöðla í íslenskri abstraktlist á 20. öld, Nína á sviði málaralistar og Gerður í höggmyndalist. Þær bjuggu báðar í París á sjötta áratugnum og tóku virkan þátt í hræringum nútímalistar á meginlandinu. Þessar sterku og metnaðarfullu listakonur mættust í Skálholtskirkju, en þær hlutu fyrstu og önnur verðlaun í samkeppni um glerglugga byggingarinnar. Gluggar Gerðar, sem settir voru í kirkjuna 1959, eru að mestu óhlutbundnir og byggjast á djúpt hugsuðu kerfi kirkjutákna og talna. Mósaíkmynd Nínu frá 1965 sýnir loftkenndan Krist birtast í íslensku landslagi. Á sýningunni er mikill fjöldi vinnuteikninga, auk málverka, höggmynda, klippimynda, vatnslitamynda og glerverka er hafa mörg ekki verið sýnd áður og spanna feril listakvennanna frá sjötta áratugnum til æviloka þeirra. Þær létust báðar um aldur fram, Gerður 47 ára og Nína 55 ára, en skildu eftir sig mikið og merkt ævistarf. Í síðustu verkum þeirra birtist sú ró og yfirvegun er bera vott um sátt fullþroska listamanns sem er í tengslum við andleg efni. Að auki gefur að sjá myndasýningu eftir Salbjörgu Ritu Jónsdóttur myndverkakonu. Ljósmyndir hennar úr Skálholtskirkju gefa tilfinningu fyrir andrúmslofti staðarins og því magnaða samspili ljóss og lita sem gluggar og mósaík skapa. Þær eru ennfremur sýn ungrar listakonu á verk Gerðar og Nínu. Sýningin mun standa til 27. september og verður safnið opið alla daga kl. 12-18. Aðgangur er ókeypis.