Listasmiðjur barna með Baniprosonno

skrifað 31. mar 2009

Indverski myndlistarmaðurinn Bonoprosonno er aftur í heimsókn í Hveragerði og mun Listasafn Árnesinga bjóða upp á listasmiðjur Baniprosonno fyrir börn nú í byrjun apríl, en fjölmörg börn kannast við fjörið frá árinu 2007. Síðar í mánuðinum verður einnig í boði námskeið fyrir fullorðna og ætti það sérstaklega að höfða til leik- og grunnskólakennara. Baniprosonno er myndlistarmaður og einnig þekktur fyrir listasmiðjur sínar sem hann hefur þróað og heldur fyrir börn víðs vegar um heiminn á ferðalögum sínum.
Hann býður upp á fjórar listasmiðjur fyrir börn, þar af eru þrjár nýjar. Tvær listasmiðjur eru ætlaðar börnum á aldrinum 8-12 ára. Annars vegar Froskar á Íslandi sem er skemmtilegt pappírsklipp og hins vegar Umbreyting hluta þar sem úreldir hlutir ganga í endurnýjun lífdaga. Fyrir börn á aldrinum 10-12 ára er í boði námskeið sem heitir Skordýraljós og þar er unnið er með pappírsklipp. Yngstu börnin fá síðan að vinna renning með Baniprosonno þar sem hann teiknar en þau mála með vatnslitum. Putul, eiginkona Baniprosonno aðstoðar manninn sinn klædd sínu hefðbunda indverska sari og fjörug indversk tónlist mun hljóma.
Þátttökugjald hvers barns fyrir hverja listasmiðju er kr. 1.000.- og er allt efni innifalið, en börnin mega gjarnan koma með gamla aflagða hluti s.s. skó, búsáhöld, lítil húsgögn eða annað smálegt á námskeiðið Umbreyting hluta. Skráning á námskeiðin er á opnunartíma Listasafns Árnesinga fimmtudaga til sunnudaga kl. 12-18 í síma 483 1727 eða á netfang safnsins listasafn@listasafnarnesinga.is.
Námskeiðið fyrir fullorðna verður 20. apríl kl. 19 - 21 og kostar 3.900 allt efni einnig innifalið. Skráning á það er hjá Fræðsluneti Suðurlands í síma 4808155. Á námskeiðinu mun Baniprosonno kenna hvernig búa má til ýmis konar dýr úr einni pappírsörk, einungis með klippi, broti og smá lími. Ekkert er klippt burt og engu bætt við.
Í Hux, lista- og tungumálamiðstöðinni á Eyrarbakka verða einnig listasmiðjur fyrir börn síðar í mánuðinum í tengslum við Indverska viku þar.