Uppskeruhátíð íþróttamanna í Hveragerði

skrifað 02. jan 2013
Íþróttamaður ársins 2012Íþróttamaður ársins 2012

Það er orðinn fastur liður í jólahátíð Hvergerðinga að Hveragerðisbær veitir afreksfólki í íþróttum viðurkenningu fyrir unnin afrek á árinu. Það er menningar-, íþrótta- og frístundanefnd sem velur íþróttamann Hveragerðis. Þeir íþróttamenn sem koma til greina þurfa að hafa stundað íþróttir fyrir íþróttafélög í Hveragerði eða eiga heimili í Hveragerði þó að íþróttin sé stunduð á vegum íþróttafélags í öðru sveitarfélagi.

Nú í desember var gerð sú breyting á reglugerðinni um kjör íþróttamanns Hveragerðis að þeir sem eru tilnefndir skulu hafa náð 16 ára aldri og eiga lögheimili í Hveragerði. Þó er heimilt að tilnefna ungling 14 – 16 ára sem keppir í flokki fullorðinna og er að ná það góðum árangri að hann teljist á meðal þeirra bestu í sinni íþróttagrein. Aðeins einn íþróttamaður hlýtur nafnbótina íþróttamaður Hveragerðis en ekki tveir eins og áður.

Íþróttamaður Hveragerðis 2012 var kjörinn Hafsteinn Valdimarsson, blakmaður

Hafsteinn hefur leikið með Marienlyst í Danmörku síðan haustið 2011 og var hann í toppbaráttu allan síðasta vetur með félaginu. Hann varð bikarmeistari í Danmörku eftir sigur á Gentofte í janúar 2012 og í lok þess mánaðar vann liðið jafnframt NEVZA keppni félagsliða og eru því ríkjandi Norðurlandameistarar. Hafsteinn er landsliðsmaður í A landsliði Íslands í blaki og lék hann 4 landsleiki á árinu.

Þeir íþróttamenn sem voru í kjöri til íþróttamanna ársins 2012 voru:

*Fannar Ingi Steingrímsson, golfari

*Guðjón Helgi Auðunsson, badmintonmaður

*Hafsteinn Valdimarsson, blakmaður

*Helga Hjartardóttir, fimleikakona

*Ingþór Björgvinsson, knattspyrnumaður

*Kristján Valdimarsson, blakmaður

*Líney Pálsdóttir, hlaupari

*María Ólafsdóttir, badmintonkona

*Marín Laufey Davíðsdóttir, körfuknattleikskona

*Úlfar Jón Andrésson, íshokkímaður

Verðlaunahafar ársins 2012