Útivistastaðir

Fá bæjarfélög á Íslandi hafa upp á jafn fjölbreytta möguleika til útivistar að bjóða og Hveragerði. Í bænum sjálfum eru einstakar náttúruperlur á borð við hverasvæðið þar semfræðast má um mismunandi tegundir hvera, og Varmá sem liðast í gegnum miðbæinn.

Skrúðgarðurinn

Skrúðgarðurinn markast af Breiðumörk, Skólamörk og Varmá. Ræktun skrúðgarðs hófst þar árið 1986 og er þar nú fallegur gróður með leiksvæði, bekkjum og borðum sem ferðamenn geta nýtt sér til útivistar. Á bakka Varmár neðan við Reykjafoss má sjá leifar af gömlum húsgrunni. Grunnurinn markar upphaf byggðar í Hveragerði því þar var ullarverksmiðja sem reist var árið 1902 og nýtti fallorku fossins. Innar í Varmárgilinu eru uppistandandi veggir rafstöðvar sem gerð var árið 1929. Þaðan má rekja undirstöður fallstokksins að heillegri stíflunni neðan Hverahvamms. Nýr og flottur göngustígur liggur meðfram Varmánni þar sem má sjá gamla húsgrunninn.Í gilinu eru hinar fegurstu litasamsetningar og hveralandslag sem enginn ætti að láta fram hjá sér fara.

Smágarðar

Smágarðarnir urðu til í kjölfarið af smágarðasamkeppninni sem haldinn var á Blóm í bæ árið 2009. Þarna er hægt að setjast niður og snæða nesti og annað. Þúfnahoppið er tilvalið fyrir krakka að leika sér og þarna eru stígar sem hægt er að hjóla og ganga eftir. Hér má sjá upplýsingar um smágarðana sem slíka.

Páfuglabekkur Einar Birgisson

Tillagan er vel framsett og frumleg. Listræn útfærsla bekks með samspili timburs og randagrass. Tillagan er óhefðbundin útfærsla á smágarði og verður fyrir vikið að einskonar skúlptúr.

Farfuglagarður Birkir Einarsson

Glaðleg og skemmtileg hugmynd að farfuglagarði. Tillagan eflir ímyndunarafl þeirra sem á horfa og höfðar vel til barna með litríkum smáhúsum sem mynda einskonar smáþorp fyrir fugla. Texti með tillögunni er líflegur og húmorsríkur.

Þúfnahopp Dagný Bjarnadóttir

Tillaga sem er skemmtileg og lifandi framsett. Allar tillögur í möppu eru áhugaverðar, en bent er á tillöguna Þúfnahopp til útfærslu. Tillagan höfðar til leikja barna og er myndrænt þúfnalandslag sem íslendingar þekkja svo vel.

Tillaga ferningur- Hringur Sigríður Brynjófsdóttir

Á einfaldan hátt er byggt upp garðrými, íverustaður sem byggður er úr rammíslensku efni. Formið er einfalt og sterkt, en þó með gott notagildi þar sem bekkur er staðsettur í miðju garðsins, en veggina sjálfa má einnig nota sem hvíldarstaði og höfða þeir einnig vel til barna.

Stoppa hér. Áslaug Katrín Aðalsteinsdóttir

Hér er byggður upp einfaldur áningastaður sem hentar á lítil svæði hvar sem er í bæjarfélögum. Tillagan sýnir fram á það hversu rúmgóð og hlýleg áningarsvæði má gera á smáum svæðum. Stílhrein og formföst tillaga með hleðslu, timbri og gróðri.

Kryddkistan Björn Axelsson

Frumleg útfærsla á matjurtagarði, sem skapar nýja sýn á notkun timburs, með timburþaki. Tillagan skapar skemmtilegt rými og veitir innsýn í þá möguleika sem felast í lóðréttri ræktun matjurta. Tillagan er í takt við tíðarandann þar sem matjurtaræktun er vaxandi þjóðaríþrótt.

Reykjadalur

Reykjadalurinn er sannkölluð útivistarperla en þarna er ein sú flottasta gönguleiðin í Hveragerði. Volgar laugar og litrík hverasvæði gera landsvæðið að einstakri náttúruperlu sem enginn útivistarmaður ætti að láta fram hjá sér fara. Sundföt eru nauðsynleg með í för en heiti lækurinn er helsta aðdráttaraflið í dalnum en hægt er að baða sig í læknum, tekur u.þ.b 1 1/2 - 2 klukkustundir að ganga að honum. Gönguleiðin er vel merkt og má sjá falleg hitasvæði á leiðinni en varast má að fara ekki útaf af gönguleiðinni.

Golfvöllurinn í Gufudal

Þeir sem eru miklir áhugamenn um golf ættu ekki að láta golfvöllinn í Hveragerði fram hjá sér fara. Fallegt umhverfi og gæði völlsins eru í fyrsta flokki en til að komast að vellinum er keyrt aðalgötu Hveragerðis, Breiðumörk , upp brekkuna og inní Gufudalinn.
Allar upplýsingar má finna á heimasíðu golfklúbbsins www.ghg.is